සදහම් අරුණැල්ලෙන් ලොව එකලු කළ චන්දිම මහ ඇඳුරු ,දැයෙන් සමුගනී. – By ආචාර්ය ගාමිණී කාරියවසම්.
ශ්‍රී ජයවර්ධනපුර විශ්වවිද්‍යාලයේ හිටපු උපකුලපති මහාචාර්ය චන්දිම විජේබණ්ඩාර මහතා කොළඹ ජාතික රෝහලේ ප්‍රතිකාර ලබමින් සිටියදී නොවැම්බර් 03 දින අභාවප්‍රාප්ත විය.
බෞද්ධ භාවනා ක්‍රම ජාත්‍යන්තරයට හඳුන්වාදීමේ පුරෝගාමියෙකු වූ එතුමා දෙස් විදෙස්හි දේශන පවත්වා ඉමහත් කීර්තියක් හිමි කරගත් විද්වතෙකි.ජ්‍යෙෂ්ඨ කථිකාචාර්යවරයකු ලෙස ශ්‍රී ජයවර්ධනපුර විශ්වවිද්‍යාලයට පිවිසෙන එතුමා 1994 දී මහාචාර්යවරයකු ලෙස පිදුම් ලැබීය. පශ්චාත් උපාධි මණ්ඩලයේ සභාපතිවරයා ලෙසත්, පාලි හා බෞද්ධ අධ්‍යයන පීඨයේ අංශ ප්‍රධානී ලෙසත් ප්‍රබුද්ධ විද්‍යාර්ථීන් රැසක් බිහිකරලන්නට එතුමා දැරූ අනුපමේය ජාතික මෙහෙවර ,මුලු මහත් ජාතියේම සම්භාවනාවට පාත්‍ර වේ.
එතුමන් ජාත්‍යන්තර සම්මන්ත්‍රණ වලට සහභාගි වෙමින්, කළ දේශනයන් විදේශීය විද්වතුන්ගේ ඉමහත් ප්‍රසාදයට නිතැතින්ම බඳුන්විය.
මහාචාර්යතුමා ,2022 වසරේ දලයි ලාමා උපහාර උළෙලේ ප්‍රධාන ආරාධිත දේශකයා ලෙසින් සහභාගී වෙමින්
බුදුදහමේ සර්වකාලීන අගය මතුකරන සුළු ශාස්ත්‍රීය ලිපි හා ,සමාජ මනෝවිද්‍යාත්මක ලිපි රැසක් හේ පුවත්පත් වෙත සම්පාදනය කළේය.බෞද්ධ ශිෂ්ටාචාරයේ මූල ධර්ම,බෞද්ධ ශිෂ්ටාචාරයේ ඉතිහාසය, බෞද්ධ චින්තනය, චීන ධම්මපද කතා,බුදු සමය හා සමාජය, Early Buddhism, its religious and intellectual milieu වන් සාර ගර්භ බෞද්ධ ග්‍රන්ථ රාශියක් එතුමා අතින් නිර්මාණය විය.
Image Source : amazon
මහාචාර්ය චන්දීම විජේබණ්ඩාර ශූරීන් බුද්ධ ධර්මය සම්බන්ධ විෂය පමණක් නොව, මනෝ විද්‍යාව ,සංස්කෘතිය, සාහිත්‍ය, ඉතිහාසය වන් විෂය ධාරාවන් සමූහයක හසළ දැනුමක් උරුම කොටගත් ප්‍රාඥයෙකි.
ප්‍රීතිමත් සහ සාර්ථක ජීවිතයක් උදෙසා….
මැයෙන් එතුමා කළ දේශනයක්
1944 අප්‍රේල් මස 23 වන දින චන්දිම විජයබණ්ඩාර ශුරීන් ජන්ම ලාභය ලබන්නේ, වරකාපොල ,කැකිරදෙනි කන්දේ මංගෙදර ග්‍රාමයේය. යොවුන් වියේදී තමන් ජනිත මහ ගෙදර, නින්දානේ චන්දිවිමල නාහිමියන් වෙත ත්‍යාග ඔප්පුවකින් පිරිනමන්නේ සම්බුද්ධ ශාසනයේ චිරස්ථිතිය උදෙසා එතුමානන් තුළ පැවැති භක්තිය මොනවට ප්‍රකට කරවමිනි.වර්තමානයේ වරකාපොළ,මං ගෙදර ග්‍රාමයේ, මෙත්මුනි විහාරය ස්ථාපිතකර ඇත්තේ එතුමා ජන්ම ලාභය ලද මහ ගෙදර පිහිටි බිම් පෙතෙහිය.
එතුමා සිය මූලික අධ්‍යාපනය හදාරන්නේ පින්වත්තේ සද්ධර්මාලංකාර පිරිවෙනේ සිසු දරුවෙක් ලෙසිනි.
පාසල් වියේ සිට ම සිසු පරපුරට ආදර්ශයක් ලෙසින් දිවි ගෙවූ එතුමා, මහාචාර්ය වන් නිලතල ලැබීමෙන් පසුව වුවද ,එදා මෙන් ම සුහද සෙනෙහසින් ඕනෑම කුඩා දරුවකුට වුවද සමීප විය හැකි නිහතමානී පැවතුම පවත්වා ගන්නට සමත් වීම දුර්ලභ ගුණාංගයක් සේ හැඟෙයි.
“කවුරු වෙන්නද පුංචි කාලෙ ඉඳල හිතාගෙන හිටියේ?”එතුමාගේ සමීප මිතුරෙක් එදවස එතුමාගෙන් විමසා ඇති බව වාර්තා වේ.“මුලදී නම් ආසාව තිබුණෙ මාධ්‍යවේදියෙක් වෙන්න. හරියට ම කියනව නම් දිනමිණ කර්තෘ වෙන්න හරි ආසාවක් තිබුණා. අපේ ගෙදර පුංචි කාලෙ ගත්තේ දිනමිණ”.
මහාචාර්ය චන්දිම විජේබණ්ඩාර මහතා තාරක සහ චානිමා යන දරුවන් දෙදෙනා ගේ පියාණන්ය.තාරක වෛද්‍ය උපකරණ ගෙන්වීමේ ආයතනයක් පවත්වාගෙන යන අතර චානිමා දියණිය කඩුවෙල අධිකරණයේ විනිසුරුවරියක ලෙස සේවයෙහි නිරතව සිටින්නීය.
එතුමාගේ මැතිණිය,මල්ලිකා කෝදාගොඩ 2019 අගෝස්තු 20 වන දින අභාවප්‍රාප්ත වුවාය. අභාවප්‍රාප්ත වූ දිනම , ඇයගේ අවසන් කටයුතු නිහඩව නිම කිරීමෙන්, මෙම ඇඳුරුතුමන් තුළ නිසගයෙන්ම පැවැති නිහතමානීත්වය පැහැදිලිවේ.මහාචාර්ය චන්දිම විජේබණ්ඩාර මහතාගේ අවසන් මනාපය පරිදි, එම දේහය වෛද්‍ය සිසුන්ගේ පර්යේෂණ කටයුතු සඳහා යොදා ගැනීම පිණිස, ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයට භාරදීමට නියමිතය.
මහාචාර්ය චන්දිම විජේබණ්ඩාර මහතා පිලිබදව තොරතුරු සපයා දුන්, එතුමාගේ සමීප සරසවි ආදී ශිෂ්‍යාවක වන,ආචාර්ය ඉන්ද්‍රානි පෙරේරා මියට අපගේ කෘතවේදීත්වය හිමිවේ.
දැයෙන් සමු ගන්නා චන්දිම විජේබණ්ඩාර මහාචාර්යතුමන්ට,අජරාමර නිවන් සුව ප්‍රාර්ථනා කරමු.
ආචාර්ය ගාමිණී කාරියවසම්.
