දැයෙන් සමු ගත් සුමියුරු සදවතිය – By ආචාර්ය ගාමිණී කාරියවසම්.
Image Source : vigasa.lk
” ආයුබෝවන් ආ.. වාසනාවන්
More Read
වාසනාවන් ආ… ආයුබෝවන්
ප්රීතිමත් සුබ උපන් දිනයක් හිමිවේවා..
ආසිරී වාදයෙන් දිගුකල් වැඦබේවා ..”
මංගලම් …
වසර හැත්තෑවකට ආසන්න කාලයක සිට , ළමා ලපටින් සිය උපන්දින ආසිරි ලබන්නට,සන්ධ්යා භාගයේ ගුවන් විදුලි යන්ත්ර වටා රොක්වූ අයුරු වත්මන් වියපත් පරපුරට මෙන්ම යෞවනයන්ට ද ඉහත ගීතය ශ්රවණයේ දී නිතැතින්ම සිහිපත් වනු නිසැකි. එම ළමා උපන් දින ආසිරි තේමා ගීතය ගැයූ,චන්ද්රානි ගුණවර්ධනයන්ගේ උපන් දිනය, ඉකුත් ඔක්තෝම්බර් 07 වන දිනට යෙදීතිබිණි.ඇය සිය උපන්දිනයේදී ම ,සිය දිවියට සමු දීම දෛවෝපගත සිදුවීමකි.ඇය වෙනුවෙන් තබන මෙම සමරු සටහන, චන්ද්රාණි ගැයූ මුල්ම ගුවන්විදුලි තේමා ගීතය ලෙස සැලකෙන, ඉහත දැක්වූ ජන්මදින ආසිරි ගීතයෙන් ආරම්භ කිරීම මැනවැයි හැඟිණි.
චන්ද්රාණී රුද්රිගු ජන්ම ලාභය ලබන්නේ,බණ්ඩාරවෙල. අමුණුදෝව නම් සොදුරු ගම් පියසෙහි ය.ඇගේ පවුලේ හත්දෙනෙක් ගෙන් යුක්ත විය. අක්කලා තිදෙනෙක්, අයියලා දෙදෙනෙක් , සහ නැගණියකගේ උණුසුම ලබන්නට ඇය භාග්යමත් වූවාය. ආතර් ඇලෙක්සැන්ඩර් රොද්රිගෝ සහ ඩේසි රොද්රිගෝ චන්ද්රානියගේ දෙමාපියන් වූහ.
ඇය ප්රාතමික අධ්යාපනය ලබන්නේ බණ්ඩාරවෙල කුඩා කුසුම් කන්යාරාම සෙවණෙහිය. කිතුණු කන්යාරාමයක අධ්යාපනය ලැබුවද ඇය සැදැහැවත් බෞද්ධ යුවතියක් වූවාය.
චන්ද්රාණී බණ්ඩාරවෙල කුඩා කුසුම් කන්යාරාමයේ ශිෂ්යාවක ලෙසින්.
බාල අවදියේ දී තම නිවසේ තිබු ග්රැමෆෝනයෙන් ,පැරැණි ගීත ශ්රවණය කෙරෙහි ඇය තුළ දැඩි රුචියක් පැවැති බැව් පැවසේ. ගායන හැකියාවෙන් පිරිපුන් ඇයගේ පියා ගේ අභාෂය සහ නිවසේ ග්රැමෆෝනයෙන් වාදිත පරණී සින්දු ශ්රවණය,කුඩා අවධියේ සිට තම සිත ගායනය කෙරෙහි යොමුවීමට හේතුවූ බැව් වරක් ඇය ප්රකාශ කළාය. අගේ පියාගේ ගම දෙහිවල වීම හේතුවෙන්,වැඩිදුර අධ්යාපනය සදහා ගල්කිස්සට සේන්දු වීමේ අවස්ථාව ඇයට හිමි විය. මෙහිදී ඇය ,වැඩිදුර අධ්යාපනය සඳහා ගල්කිස්ස උසස් බාලිකාවට ඇතුළත් කරනු ලැබිණි.පාසල් වියේ දී ගායනයට පමණක් නොව රංගනයට ද, ඇය තුළ පැවැති සහජ කුසලතාවන් මැනවින් ඉස්මතු විය.
චන්ද්රානිය මුල් වරට ගුවන් විදුලි මහ ගෙදර වෙත පිය නග න්නේද,ගල්කිස්ස උසස් බාලිකාවේ ඉගෙනීම ලබමින් සිටි කාල වකවානුවෙහිය. කරුණාරත්න අබේසේකර, මඩවල එස්. රත්නායක, සරත් විමලවීර,ප්රභා රණතුංග මෙහෙයවූ ළමා පිටිය වැඩ සටහන්හි නිරතුරු ළමා ගී ගායනයේ යෙදෙන්නට ඇයට අවකාශය සැලසිණි.
“දැන් නිවාඩු කාලේ හින්දා නෑ ඉස්කෝලේ…”ළමා පිටියේදී ඇය ගායනා කළ කුලුදුල් ගීතය ලෙසින් සැළකේ.
More Read
අනතුරුව ,ගුවන් විදුලි ළමා ගීත රාශියක් ගායනයෙහි නියැලෙමින් , ළමා මනසේ සෞන්දර්ය පෝෂණහි ලා ,චන්ද්රානි ගුණවර්ධනයන් ඉටුකර ඇති කලා මෙහෙවර සුළුප ටු නොවේ.
වාසනාවේ…
වැඩිවිය පත්ව ළමා පිටියෙන් ඉවත්වූ චන්ද්රානිය,ගුවන්විදුලියේ “A ශ්රේණියේ ගායිකාවක් ලෙස උසස් ලෙසින් සමත්වුවාය.එදා මෙදා තුර ඇය විසින් සිංහල ගීත සාහිත්යය ගඟුලැල්ලට එක් කර ඇති ගී සමුදාය දහස ද ඉක්මවයි.
ගායිකාවක් ලෙසින් පමණක් නොව, වේදිකා නාට්ය ශිල්පිනියක් ලෙසින්ද චන්ද්රාණි සිය රංගන කුසලතා මැනවින් ප්රකට කළ ශිල්පිනියකි. පාසලේ රාමායනය නාට්යය වේදිකා ගත කළ අවස්ථාවේ සීතාගේ චරිතය රඟපා ඇත්තේ ඇයයි. දයානන්ද ගුණවර්ධන ශුරීන්ගේ “පත්මාවතී* නාට්යයේ ප්රධාන චරිතය වූ පත්මාවතීගේ චරිතය රඟපෑමේ අවස්තාව ද ඇය හිමිකර ගත්තාය. ඇය සිය වෘත්තීය ජීවිතය අරඹන්නේ පන්නිපිටියේ ධර්මපාල විද්යාලයේ නර්තනය ගුරුතුමියක ලෙසිනි.
කෙටි ඇසුරකින් හදුනාගත් ක්ලිෆඩ් ගුනවර්ධනයන් සමග චන්ද්රාණි 1966 අගෝස්තු 18 වන දින යුග දිවි ගමන් ඇරඹුවාය.
චන්ද්රානි ,එදවස ළයෙහි නිපන් ප්රේමණීය හැඟුමන් ගීතයකින් කුළුගැන්වූ අයුරු.….
චන්ද්රා
චන්ද්රානි, එච්.ආර්.ජෝතිපාල සමග යුග ගීතයක් ගායනා කළ අවස්ථාව.
Image Source :facebook
1978 වසරේදී ටවර් හෝල් රඟහල විවෘත කිරීමත් සමග වේදිකා ගත කළ සිරිසඟබෝ නාට්යයේ බිසවගේ චරිතය නිරුපනය කළ චන්ද්රානි ,එවකට ජනාධිපති රණසිංහ ප්රේමදාස මැතිතුමා ගේ නොමද ප්රශංසාවට බදුන් විය.
සිරිසඟබෝ වේදිකා නාට්යයයේ රගපෑ චන්ද්රානි ගුණවර්ධන ඇතුළු ශිල්පීන් සියලු දෙනා දිරිමත් කිරීමසහ ,එම නාට්යයට ජාත්යන්තර ආකර්ශනය ලබා දීමේ යහ අපේක්ෂාවෙන් චීනයට යැවීමට ජනාධිපති රණසිංහ ප්රේමදාස මහතා කෘතවේදී විය.
ඇයට වැල්ලවත්තේ වේළුවනාරාම මහල් නිවාස සංකීර්ණයෙන් නිවසක් ලබා දීමට පවා එතුමා කාරුණික වු බැව් පැවසේ.
2018 වසරේ මා ටවර් රංගශාලා පදනමේ අධ්යක්ෂ ජනරාල් ලෙසින් රාජකාරී කළ සමයේ, චන්ද්රාණි ගුණවර්ධන කලා ක්ෂේත්රය වෙනුවෙන් ඉටු කළ සේවාව ඇගයීම පිණිස,එල්ෆිනිස්ටන් රංග ශාලාවේ උපහාර උළෙලක් පැවැත්වීමට කටයුතු කළෙමි.නාට්ය ශිල්පිනියක ලෙසින් ඇයගේ රංගනයන් සහ ගායනයන් නූතන පරපුර වෙත හඳුන්වාදීම පිණිස මෙම උපහාර උළෙල අතිශයින් වැදගත් විය.
හැඩකාරී මං පොඩි කාලේ ….
හඬෙහි රසාලිප්ත ද්වනි මාධුර්ය නිසා ,චන්ද්රාණි ගායනා කරන ලද සෑම ගීතයක් ම, රසික හදවත් ආකර්ෂණය කර ගැනීමට සමත් විය.
රාං කුරුල්ලා රූං කියාගෙන කන්ද උඩින් වඩිතෙයි,විහාර මහ දේවී – සෝමා දේවී දුවේ නුඹේ නෑදෑයෝ,මල් කෙල්ලෙක් මං – මල් දෙන්නම් මං”අත්තන මල් අත්තන මල්”, “මලක සුවඳ සිව්සිය ගව්”,මේ ආදී වශයෙන් ඇය සුසර කළ ගීතා වලිය,යුගයුග රසික හදවත් අමන්දානන්දයට පත් කරවන සුළුය. තත් ගී ඇගේ ගී ගමන් මග ස්වර්ණමය සලකුණු තැබීමට හේතු වාසනා සැලසීය.
ලතා මඩුල්ලක්… එඩ්වර්ඩ් ජයකොඩි සමග.
චන්ද්රානි ගුණවර්ධන ,මෑතකදී සිය මතකය අවදි කළ අවස්ථාවක්
ඇය සිය ගායන දිවිය තුළ රසික ආකර්ශනය දිනාගත් ගීත අතරින් .
“තුන් තුඹ මල් තුඹ මල්”, ගීතය ට ප්රමුඛ ස්ථානයක් හිමිවේ.
1996 වසරේදී ඇය මුහුණ දුන් මාරාන්තික රිය අනතුරකින් පසුව ගායන දිවියෙන් මදක් දුරස් වීමට ඇයට සිදු විය.
මෑතකදී මා ඇයගේ සුවදුක් දැනගැනීමේ අභිලාෂයෙන් දුරකථන මගින් ඇය ඇමතු අවස්ථාවේ ,ඇය දැඩි ලෙස ගිලන්ව සිටි බැව් දැනගන්නට ලැබිණි. තම සහෝදර සහෝදරියන් හත් දෙනා අතරින්,දැනට සුජීවත්ව සිටින්නේ ඩග්ලස්, හේමා සහ ලක්ෂ්මි යන තිදෙනා බව ඇය සඳහන් කළේ ශෝකී ස්වරයෙනි.තම දුව ඉන්දිකා සහ පුත් සුරාජ් විදේශගතව සිටින බැවින් , වසර ගණනාවක සිට හුදකලාව සිටින තමන් හොඳින් රැක බලා ගන්නේ මාලනී අමරසේකර නමැත්තියක් බව ඇය පැවසුවේ කෘතවෙදීත්වයෙන් යුතුවය. කුරුල්ලෙක් වෙලා ලස්සන තටු සලන්නෙමි යන ගීතය ඇය ගයන්නේ ,ඇයගේ නැගණිය වන ලක්ෂ්මී සමගය.
චන්ද්රානි ගුණවර්ධන සුනිල් එදිරිසිංහ සමග හඩා වැටෙන හදවතින්…
චන්ද්රාණි ගුණවර්ධන කලාකාරියගේ රුප කාය ,දැවුම් සෑයේ දැවී, දුම් රොටු ලෙසින්, වා ගැබට මුසුව වියැකී ගියද ,ඇය සිය මියුරු හඩින් සිංහල ගීත සාහිත්යයට එක්කළ ගීත සමුදායේ රසාස්වාදය ,කප් සුවහසක් රසික ජන සන්තානයේ නීති නින්නාද වනු නියති.
ආචාර්ය ගාමිණී කාරියවසම්.
